Romi Lipiek Soggleo Souloteo Mellcheo

Romi Lipiek Soggleo Souloteo Mellcheo

Borovpi : Vincy Quadros

Gộykaramni 1987 vorsak bhaxecho proxnn mittoilo oxem mhunn zaite Konknni monis bovall martat. Bhaxecho proxnn mittoilo mhollear khorench kitem kelem? Rajbhas kaido pas kelo ani Konknni Gộychi rajbhas keli. Rajbhas kaideantli Konknni Devnagiri lipint aslolean ticho fuddar mutthbhor monxanchea hatant poddlo ani tankam zai tem tannim tharavpak mekllik mell’li. Gộyant don lipio vapurta astana ekuch lipi manun ghetli tedna konnem tori gondoll kelo hem zanchea lokxant aile te ogi ravle. Tench nhoi tor tannim Jea vellar bhaxecho proxnn mittoil’lo teach vellar zor Rajbhas kaido chalik lail’lo zalear ghoddie aiz chitr vegllem astolem aslem. Tem konnem ghoddonk dilemna? Gộychi fallnni korunk sodtoleamni vo rajkarnneamni? Modim vis vorsancho kall soron gelo. Hea kallant Gộykar il’le il’le dumotan vagot gele. Konknni mhollear Devnagiri lipient Konknni mhunnlolean Romi lipient Konknni vapurtoleanchi kim’mot urli na. tanchem sahitya ek koddek poddlem. Thoddeamni tem dorzo naslolem sahitya mhollem. Xembhor vorsancho itihas aslolo ani lokpriya nattyaprokar mhunn aizver nettan choltolo tiatr xunya zalo. Kristi lokanim dhormik mollar vapurloli lipi mol nasloli zali. Haka lagon zaitea Konknni monxancheo bhavna dukhouleo. Je Romi lipicho hok’k magtat te bhaxa mogi bhavnavosh zaleat, tankam aple bhaxecho kollvollo aila ani ek oproteokxponnim bhirant zannvonk laglea, ek dis Konknnichi Romi lipi na zatoli ani aple khatir kainch urchemna mhunn. Gộychea charui konxamni nodor marlear tancheo bhavna ortha bhorit distat. Gộyant vaprant yevpi Romi lipi ani Nagri lipi hacho gunn toktto kaddit zalear Romi lipichench dhalem zhodd distolem. Hi sot poristhiti aiche ghottkek tori konnuch nhoikarunk xokona. Romi lipint ekuch unnem asa tem mhollear tichem ek legit disallem na. Punn kitlinch masikam asat jim Nagrint nant. Toxi hi tulnatmok bhazu nhoi. Je vorim Kornattokant Konknni Kon’nod lipint cholta, toxich Gộyant Romi lipint cholta mhollear otitai zaunchi na. Kristi lok dor misantlean Romi lipicho vapor kortat ani kitlech Hindu / musolman bhav-bhoini Romi lipintlean vachtat boroitat. Dekhun dista Rajbhas kaideant nhoi tor kaidea bhair Romi lipik favo tem sthan dil’lem zalear aiz chollvoll ubarpachi palli konnacher yenvchi nasli. He chollvollin Gộykaram modem tong vatavoronn nirmann kelam. Eklean aplo vichar manddlear dusro zap diunk eka payar ubo asta. Kiteak? Uloupachem svontr legit Rajbhas kaideant ghalun dil’lem asa?


He fatt bhuim-cher fattlim don vorsam lipi chollvoll Gộyant ubi zalea. Rajki monis zanka Nagri kollona tanchea kallzant Romi lipicho mog zago zala. Dekhun 2008 Agostachea nimnnea Vidhan Sobha odhivexonant lok-bhavnank ‘hoi’ diupa khatir Gộychea amdaramni ani montreamni Vidhan Sobhent bindast ulopachem dhaddos kelem. Gộy Vidhan Sobhechea orth sonkolpachea magnneam voile cheorchent UpSobhapoti MauvinGodinha-n Romi lipi Konknnicho pako gheun ticher zal’lea on’nyayancho ul’lekh kelo. Taka sangat dilo Babush Monserat, Aleixo Reginaldo Lourence, Victoria Fernandes, Agnelo Fernandes, Francisco Silveira hea amdaramni. Romi lipicho dhormik mollar, tiatrant ani her lugarancher Gộyant koso ani kitlo vapor zata hacher tannim uzvadd ghatlo. Hea xivai Mukhel Montreak porxim bhettun kaim montreamni Romi lipik aslolo tenko jahir kelo. Mhunn 25 Agost 2006 disa Mukhel Montri Digamber Kamat hannim Gộy Vidhan Sobhent ek itihasik ghoxnna keli ani Gộykaranchea kallzant aplea khatir il’lo lugar vaddoun ghetlo.


He ghoxnnen Gộykaram modim dumot nirmann zalem. Kaim zannamni taka yevkar dilo ani kaim zannamni virodh kelo. Konknnichea kaim lokancho veglle toren vichar zata zalear taka virodh korpachi groz asli kai? Fokot ghoxnna kelear virodh zata zalear Mukhel Montri khoreanich boska apoitolo tedna zhogddim zait mhunn dubav yeta. Konknni Bhasha Mandal-achi bhumika kitem kai? Ji sounstha Romi lipientlea Konknnicher adarun sthapon zal’li ani survek Romi lipientlean vevhar kortali ti sounstha aiz Romi lipiechea virodhant vavurta kai? Khorem mhollear Konknni Bhasha Mandal-an Mukhel Montreachea ulounneak yevkar diunk zai Romi lipik jem unnem poddta tem melloun diunk hatbhar launk zai. Romi lipi nastana Konknnicho vikas zaunk xokta? Vivid’tayent zap sodpacho proxnn.


Mat Virodhi Pokx fuddari Manohar Parrikaran jyust ek sondi ghetli. Ddavpech koxe khellop te Parrikara koddlean xikunk zai. Tannem konnakuch dukhoile nant bogor hansot hansot Vidhan Sobhent Moratthi bhaxechi bazu manddli. Te adim tannem Moratthi Rajbhaxa Prosthapon Somiti ani Romi Lipi Kruti Aghaddin dil’lea veg-vegllea suchounneancher toddgo kaddpak kruti doll sthapon korchem oso khazgi tharav Vidhan Sobhe mukhar dakhol kel’lo. Hea dollant somazantlea veg-vegllea ghottokant toxench rajki pokxanchea protinidhink suvat diunchi oxem tannim suchoil’lem. Hea vadak lagon sod’dea pradexik ani somajik panvddear futt poddpak laglea ani Gộycho ekvott kayom dovorpa khatir ho proxn soddovop khub gorjechem asa oxem to manta.


Hem kruti doll sthapon korpacho vichar Mukhel Montrean bhair marla ani atam hea proxnacher soglleamni ektthaim bosun bhasabhas korun nirnnoi gheupacho vell uktaila. Konknni Romi lipi ani Moratthi bhaxe kodden sombondit sounstha, fuddari ani sogllea rajki pokxank visvasant gheunuch ho proxn soddoupacher tannim visvas dakhoila. Dekhun hem Vidhan Sobha Odhivexon somptoch soglleanchi khas boska apopita ani bhaxa proxnacher sasannacho toddgo kaddta oxi itihasik ghoxnna Mukhel Montrean keli taka somest Gộykaramni yevkar dila.


Hanv ek niz Gộykar. Konknni mhoji maimbhas. Tiche khatir bhaxa chollvollint hanvem bhag ghetlolo, tiche khatir teag kelolo monis hanv. Mhoji bhazu spoxtt asa. Konknni monis jedna aple bhaxechi tank topasta tedna taka Gộyant Konknni khatir asloleo donui lipi dixtti poddtat. Nagri lipik odhikrut manyatay mell’lea zalear Romi lipik favo to man mellunkuch zai, nidan Moratthi bhaxe itleo tori souloteo mellonk zai. Moratthi bhaxek Rajbhas vidheyok pas kortana zo dozo dila to gorje poros chodd dila. Moratthi bhas Gộyche zaite lok vapurtat, ticho dhormik vapor ami lokxant ghetat punn ti bhas somajik jivitant vapornant hem titlench mhotvachem. Gộychi porza 90-95 % Konknni bhaxent uloita dekhun Konknnik zo manacho patth favo kela to kaidexir asa, tiche konnxak anik konnakuch bosunk lugar na. Rajki mollar Moratthi khatir jeo magonastana sovloteo melltat tacho vichar kelo zalear 90-95 % lokanche bhaxek kitleo sovloteo melltat hacherui sorkaran ani Moratthi mogeamni vichar korunk zai. Ami mhunnonant tancheo sovloteo bond korcheo punn ami mhunttat zankam mellonant tankaim sovloteo diuncheo. Zaka favta taka mellonastana gorje bhair melltoleachi konnakui kinv yetach. Ami mhunttat zogat ani zogunk diyat.


Konknni bhas vapurtolea loka modem futt poddchi nhoi ani te sodanch ekvottan mukhar veche hea dhornnan ami kam korit asa. Hea havesa boroboruch sorkari panvddear Konknni bhaxek donui lipiank (Romi ani Devnagiri) eksarki vagnnuk mellchi mhunn amcho oproteokxponnan proitn chalu asa. Kristi lok Konknni pasun pois vetat mhunn tankam Konknni kodden addaun dovorpachi amchi mokh asa. Tornatte ani xiklole Gộykar Konknni bhaxek aplea jivitant favo to man dinant tanchei modim Konknnichi avodd nirmann korpacho amcho hetu asa. Hea yotnant atam sorkari adarachi bhor poddta hi khoxechi gozal. Goa Konknni Akademi zo vavr korta to tokhnnayek patr asa. Mat ek bhirant asa Goa Konknni Akademi toyar korta te boroupi Konknni vachpeam poros chodd zait mhunn. Lipiancho bhed-bhav korinastana Konknni bhaxek mukhar vhorta tea monxak hanv solam kortam ani man bhagoitam. Dalgad Konknni Akademi atanch kamak laglea, tika ami borem yox anvddetat. Novea vicharamni amkam Gộy mukhar gheun vochpachem asa. Rajki monxank Konknnichi umollxik laglea hem boreachem chin’n.


Gộychea Mukhel Montrean Konknni khatir zaitem kitem kelam hem ami sangchi goroz na. Atam to marunk veta tem ekdom boreachem ani gorjechem panvl. Romi lipik azun zaiteo sovloteo mellpacheo urleat, teo mellpak hacho khatren faido zatolo. Dekhun zata title begin hea bhaxa proxnacho sokx-mokx lailear Gộy ani Gộychi porza rajki monxanchea upkarant urtoli. Amche vorim anik zaite zann Konknni bhaxechi sorvanginn udorgot zaunchi mhunn vavurtat tannim bori manddavoll gheun mukhar yenvchem ani Konknni monxachea ekvottachi gantt on’nun dovrunk adar korcho. Na zalear mellot to bhaxa chollvollint denvta ani naka zal’li magnni korta tankam addaupachi goroz asa. Gộy Gộykaranchem dekhun Gộychem hit polloun vichar korunk amchi zobabdari. Konknni bhaxechi bhorpur udorgot zaum ani ek dis Konknni mortoli mhunnpeanchea kallzant Konknni bhaxecho umallo futtun yenv hoch amcho haves.


(Ho lekh Thomas Stephens Konknni Kendrachea SOD nemallear chhapun aila)